Neyðin kennir naktri konu að spinna

Nei, Steingrímur....NEI !!

2011-12-31T02:41:00.000-08:00

Endurholdgun?

2010-11-12T00:37:00.001-08:00

Þórir Snær Sigurjónsson og Orson Welles.

Af lítilsvirðingu kjósanda.

2010-11-05T01:47:00.001-07:00

Fyrir síðustu borgarstjórnarkosningar, bar andúð mín á fjórflokknum mig ofurliði og ég, sem fram að því hafði aldrei verið skráður meðlimur í nokkrum flokki eða bandalagi, lét tilleiðast og skráði nafn mitt á lista fylgismanna Besta flokksins á vefsíðu þeirra. Að auki setti ég X við Æ á kjördag.

Í haust varð ég afhuga borgarstjórnarmeirihlutanum, eftir að mér varð ljóst að ég hafði í reynd kosið Samfylkinguna, og hef ég síðan gert nokkrar árangurslausar tilraunir til að
a) að ganga úr flokknum
b) að fá nafn mitt tekið af lista yfir flokksmenn á
www.bestiflokkurinn.is

Skemmst er frá því að segja að bréf í póstkassa á vefsíðu flokksins,sem merktur er til þeirra hluta bar ekki árangur. Viku síðar átti ég símtal við handhafa skráðs síma flokksins (sá lét stuttu seinna af starfi aðstoðarmanns borgarstjóra - að sögn til þess að sinna flokksstarfinu) sem kvaðst ætla að verða við beiðni minni og taka nafn mitt af lista yfir flokksmenn.

Þar sem ég var enn á listanum meira en viku síðar, sá ég mér þann kost vænstan að senda borgarstjóra orðsendingu á facebook.com, en hún hefur væntanlega horfið óséð inn á milli skjalls frá stuðnngsmönnum og Janson/Egner vangaveltna.

Ég efast ekki um að þessar tilraunir mínar hafi orðið einhverjum innanbúðar tilefni til aðhláturs, en nú er mér nóg boðið og ég get ekki annað en viðrað hugsanir mínar um virðingarleysi og léttúð hlutaðeigandi. Nafnið mitt er mér dýrmætt og ég hef þrisvar óskað eftir því að það verði afmáð af vefsíðu flokksins, án árangurs.

Stjórnmálaflokkur sem ekki býr yfir atgervi til þess að uppfæra vefsíðu sína er vægast sagt ólíklegur til stjórnsýslulegra stórræða.

Mér verður tíðhugsað til Helga Hóseassonar!

UPPSKRIFT..

2010-07-13T02:30:00.000-07:00

...að hjónabandssælu fyrir siðblinda flottræfla:

Takið mergsogið fyrirtæki með botnlausar skuldir og vangreidd laun og launatengd gjöld. Komið þessu kyrfilega fyrir undir koddanum HANS MEGIN.

Stofnið síðan nýtt eignarhaldsfélag undir koddanum HENNAR - og flytjið þangað öll verðmæti.

Gott er að eiga a.m.k. eitt barn á lager - því þeim fylgir jú óflekkuð kennitala.

Þau ykkar sem eruð atvinnulaus eða getið ekki leyft ykkur að fara neitt í sumarfríinu af því að þið eruð að reyna að standa í skilum, styttið ykkur stundir við að lita myndina og merkja inn það sem hugsanlega getur komið svona hyski til góða.

Undanfarinn skortur á tvíförum...

2010-06-03T06:28:00.000-07:00

...stafar af því að allir hafa reynst vera eins.

Hvenær verða hegningarlög...

2010-05-16T07:13:00.000-07:00

...hengingarlög?

Rjómabúið á Baugsstöðum...

2010-04-25T09:25:00.000-07:00

...var tekið í notkun árið 1904

Ekkert annað jafnast á við nýjustu smjörklípu Davíðs Oddsonar - sem hann ber á borð í umsögn sinni um Skýrsluhöfunda:

http://eyjan.is/blog/2010/04/25/david-oddsson-sjonarmid-rannsoknarnefndar-annarleg-menn-eltir-med-smasmyglislegum-stjornsyslusjonarmidum/

Hef lesið bréfið...

2010-04-22T01:37:00.000-07:00

...sem þú lést birta í Fréttablaðinu í dag.

Varðandi innihaldið þá þykir mér það rýrt og auðsætt að þú hefur notið aðstoðar einhvers með talsmáta sem fellur illa að þínum - því eins og alþjóð veit ertu ekki sérlega orðheppinn maður.

Ég skil mætavel að þér sé órótt og ekki nema von að það sæki að þér eftirsjá og jafnvel þunglyndi - og það er gott, því það gefur þér tækifæri til raunverulegrar iðrunar, sem er afar hreinsandi fyrir sálina.

Í dag er orðspor þitt slíkt að trúlegt er að þú sért ekki lengur gjaldgengur þar sem þú vildir helst hafa þig í hópi á erlendri grund og varla geturðu leikið lausum hala á Íslandi. Þetta er erfið staða og níðþröng - sér í lagi fyrir menn sem hafa þörf fyrir að sníða sér stakka, í yfirstærðum,úr öllu því vaðmáli sem þeir hafa getað sölsað undir sig - uppá krít.

Ég gæti sjálfsagt haft þetta mikið lengra og dregið þig sundur og saman í háði, því af nógu er að taka, en mér er engin huggun í því og þess vegna skal ég hafa þetta stutt:

Þér er vorkunn, að vera svona innréttaður, en fyrirgefningar er ekki að leita hjá mér og mínum. Vera má að þú hefðir uppskorið samúð mína ef bréfið hefði borist mér fyrir hálfu öðru ári - og þú boðist til að láta eitthvað á móti þér þá þegar.

En þá var allt annað hljóð í strokknum þegar eftir var leitað og þú forhertur (minni á einkennileg ummæli þín um ákveðinn gosdrykk).

Þú hefðir t.d. getað sýnt iðrun með því að draga til baka eitthvað af þeim þráteflum sem þú rekur fyrir dómi - á kostnað samlanda þinna. Það hefði verið sterkur leikur á sínum tíma og vænlegur til þess að afla þér samúðar.

En um bréfið þitt er ekki meira að segja og sjálfsagt best að þú og félagar þínir opnið saman vefsíðu, þar sem þið getið birt hugrenningar ykkar og þeir sem hafa áhuga vita þá hvert þeir geta leitað.

Bíddu þess sem verða vill, taktu því eins og maður og þú getur stytt þér stundir, í langa fríinu, með því að skrifa frá eigin brjósti, frásögn af því hvað rak þig til þess sem orðið er.

Þá fyrst geturðu beðið okkur fyrirgefningar.

HVER KLÁRAÐI SNÚÐANA???!!!

2010-04-21T03:47:00.000-07:00

Eru tilviljanir til?

2010-04-15T10:40:00.001-07:00

Hera B. og Haraldur B.

Hera B. og Haraldur B.

Þroskastríðið...

2010-04-13T10:57:00.001-07:00

...er sú barátta sem Íslendingar verða að heyja til þess að sigrast á lestinum sem er okkur skeinuhættastur; agaleysinu.

Vígvöllurinn er þjóðarsálin - sem rekur útibú í brjósti okkar allra. Lítum í eigin barm!

Frá sjónarhóli væntanlegs greiðanda:

2010-02-26T08:33:00.000-08:00

Höfundur er 18 ára og býr í Reykjavík.

Umsögn án orða!

2010-01-27T00:38:00.000-08:00

Óvænt eftirspurn eftir langveikum endurskoðendum.

2010-01-26T12:52:00.000-08:00

Átt þú í fórum þínum langlegusjúkling með endurskoðunarréttindi?
Nú er rétti tíminn til að koma honum í verð...

Dolphinnur bankastjóri...

2009-11-24T12:06:00.000-08:00

... og þessi netti kjölturakki eru sigurvegarar í tvífarakeppni nóvembermnánaðar.

Hellusyndararnir...

2009-10-11T07:23:00.000-07:00

...kunna greinilega ekki aðra lánapólitík en að lán eins sé annars vextir - og þurfi að sækja peningana í annan sandkassa er tryggt að þeir lendi ekki á öðrum róló!

Grafarþögn,

2009-10-11T06:56:00.000-07:00

...því fæstir þora að æmta eða skræmta af ótta við að lenda andfætis við valdhafana þegar/ef ástandið skánar/batnar.

Frekar þegir fólk þunnu hljóði en að eiga það á hættu að hafa talað sig/sína út úr mannsæmandi elliheimilisplássi!

Þetta eru ekki bara teinótt jakkaföt ...

2009-10-10T05:11:00.000-07:00

...þetta eru FREUDÍSKIR RIMLAR!!!

Hún hófst með Landnámu...

2009-09-23T10:52:00.000-07:00

...en líkur Íslandssögunni 1135 árum síðar með Fjárnámu?

Rauða spjaldið!

2009-08-16T05:53:00.000-07:00

Það er alveg sama hvað Birgitta og Þór rembast við að bera í bætifláka fyrir flærðarlega orðaðan tölvupóst Margrétar Tryggvadóttur(sem karmalögmálið notaði til að bíta hana í rassinn) og skrifaður er undir yfirskyni umhyggju og náungakærleika.
Margrét á sér ekki viðreisnar von!

Hún á að sjá sóma sinn í því að hverfa af þingi og þingflokkurinn á að kalla til varamann.

Áframhaldandi setu Margrétar á þingi mun ég og mitt fólk, líta á sem saurgun atkvæða okkar.

Það eru hvorki þjóðhollusta ...

2009-07-15T10:23:00.000-07:00

...né ættjarðarást sem hafa ráðið ferðinni út i fenið sem við nú veltumst í - stjórnlaus og ráðþrota.

Á hverjum degi, þegar þingað er við Austurvöll, fylgist ég með umræðum eins lengi og ég treysti mér til, án þess að bera skaða af.

Ég lít á það sem skyldu mína svo ég geti leyft mér að leggja orð í belg.

Eftir umræður undanfarinna daga (nær undantekningalaust) hef ég komist að þeirri niðurstöðu að það besta sem fyrir ættlausa og ótengda Íslendinga gæti komið væri að þjóðinni yrðu skipaðir óháðir tilsjónarmenn. Ef það er ekki hægt öðru vísi en með inngöngu í ESB - þá verður svo að vera.

Ég mun greiða atkvæði með inngöngu á framangreindum forsendum - helst bara einu sinni, í sparnaðarskyni!

Sjúkrasaga ...

2009-07-12T02:12:00.000-07:00

....íslensku krónunnar er orðin býsna löng.
Síðustu ár hefur henni verið haldið á löppum með örvandi innspýtingum sem hafa gereyðilagt viðkvæm innri líffærakerfi.

Þeir sem hún er hjartfólgnust halda því fram að nú styrkist hún dag frá degi og eigi eftir að verða stálslegin.

En því miður gleyma þessi tryggðatröll því að það er oftar en ekki að langlegusjúklinga bíður ekki annað en að vera uppá aðra komnir til æviloka.

Hvernig framtíð biði hennar ef allt færi á besta veg?

Útlensku kærastarnir eru farnir og hringja aldrei - eru hættir að borga með lausaleikskrógunum hennar og þeim er einum af öðrum komið fyrir hjá lægstbjóðendum.

Því er mannúðlegast að leggja hana inn á viðeigandis stofnun eða hreinlega að láta svæfa hana.

Bragðarefirnir eru á þrotum....

2009-07-01T02:54:00.000-07:00

...og sjeikvélin ónýt - en má bjóða þér girnilegan Icesave með krappri dýfu og lánakúlukurli?

Vormenn Íslands...

2009-06-27T04:11:00.001-07:00

...yðar bíða
Icesave skuldir,
vaxtafen...

Helvítis lúxus-djöflarnir!

2009-06-07T02:06:00.000-07:00

Ég hefði svo gjarnan viljað sýna ykkur mynd af ,,Lúxus-Djöflatertunni´´ sem ég sá í Bónus um daginn. innpakkaða í plasthjálm - löðrandi í kremi.

Ég stóð í þeirri meiningu að djöflaterta (devils food cake uppá ensku) væri tilvísun í syndsamlega græðgi og lastafullt líferni - sem sauðsvörtum almúganum leyfðist að láta eftir sér á afmælum.

En wikipedia.com leiddi mig í allan sannleika um tilurð heitisins:
http://en.wikipedia.org/wiki/Devil%27s_food_cake"

Djöflaterta er gerð stærri og svartari með lævísri notkun lyftiefna sem þenur efnisrýrt deigið í kökuna að ystu mörkum mögulegs umfangs.

Óhófleg neysla veldur því óhjákvæmilega innantökum sem enda með því að líkaminn dregur úr þenslunni með náttúrlegri aðferð sem endar í mismikilli pappírsvinnu...

Djöflatertan lýtur sömu lögmálum og það tímabil Íslandssögunnar sem við lifum nú.

En hvar eru Lúxus-djöflarnir?

Illa fenginn fararskjóti?

2009-05-23T02:00:00.000-07:00

Mér varð um og ó í gær. Var að silast yfir hraðahindrunina sem skilur götuna sem ég bý við, frá einni af 10 mestu umferðargötum í Reykjavík - vestan Elliðaáa.

Allt í einu kemur mótorhjól(þreytulegt yfirlitum og dempararnir greinilega farnir að gefa sig) brunandi og sveigir af aðalbrautinni, inn í götuna og við mætumst á hraðahindruninni. Mér rann kalt vatn á milli skinns og hörunds!

Þarna tvímenntu ungir menn (vart af barnsaldri)sá aftari ríghélt um ökubarnið og á andlitum tveggja var stirðnuð blanda af spennu og hræðslu. En ástæða þess að ég hef orð á þessu er sú að báðir voru berhöfðaðir - með lubbana flaksandi ofaní augum.

Ég þurfti að stilla mig um að snúa ekki við og elta þá uppi - hefði sjálfsagt gert það ef þeir hefðu ekki sveigt niður gangstíg og út úr þessari sögu.

Hrollurinn situr hins vegar enn í mér.

Ísbjörn,ísbjörn!

2009-05-09T10:10:00.000-07:00

...oddfellow.is hefur eftirfarandi að segja um hringina, merki samtakanna:
,,Þeir tákna vináttu, kærleika og sannleika sem eru einkunnarorð Reglunnar.

Allt starf Oddfellowa, hvar sem er í heiminum, byggir á starfi í vináttu og sannleika sem grundvallað er í kærleika. Miðhlekkurinn táknar kærleikann sem er þeirra mestur og tengir saman vináttu og sannleika.´´

Hvar voru allir?

2009-05-09T01:09:00.000-07:00

Skýringa á lélegri þátttöku í mótmælunum í gær er að leita í tvennu:

1. Það er stutt liðið frá mánaðarmótum og fólk er ekki búið að ná sér upp úr gjalddagaþunglyndinu - sem að sönnu er orðið viðvarandi ástand á mörgum heimilum.

2. Fólk sem er í vinnu, þorir ekki fyrir sitt litla líf að bregða sér frá vegna hættu á uppsögn eða hreinlega gjaldþroti fyrirtækisins ef starfsmennirnir eru ekki í boð-lífróðri!
Gylfi Arnbjörnsson náði ekki að hreinsa þykkjuna, sem ég el í brjósti mér gagnvart honum og ASÍ - þrátt fyrir að hann gerði sér far um að dingla fætinum alþýðlega, þar sem hann sat á hjólhestinum sínum upp við styttuna af Jóni Sigurðssyni.

Auk þess er flest fólk feimið við að lenda í skotlínu fjölmiðlafólks - sem í gær töldust maður á hvern mótmælanda þar til klukkan var stundarfjórðung gengin í tvö.

Það eru helst þeir sem farnir eru að taka inn við ástandinu sem fást til að opna munninn....

og innlegg í grillumræðuna:

Það er greinilegt að stjórnvöld ætla sér að varpa þeim sem verst eru staddir á gljáfægð grill góðærisins. Þ.e. þau fáu sem ekki eru orðin helköld!

Það er hætt við ...

2009-04-27T11:27:00.000-07:00

...að mörgum bregði í brún þegar þeir átta sig á því að skriðið hefur verið uppí til þeirra á fölskum forsendum.
Hvað svo sem menn hafa lesið út úr atlotum ósofinna ráðherra.

Marsipantengingin.

2009-04-13T01:53:00.000-07:00

Þegar ég sé heimagert marsipanskraut minnist ég alltaf sögu sem mér var sögð við eldhúsborð, fyrir meira en þrjátíu árum, þar sem kvenfólk á ýmsum aldri sat saman og aðstoðaði húsfreyju vegna fermingar yngsta barnsins á heimilinu. Það var annað hvort númer átta eða níu í röðinni og mamman því orðin nokkuð sjóuð í því sem núna er kallað verkferli.

Það sem gerir þetta atvik eftirminnilegt var hvorki marsipanið né tilefnið, heldur saga sem var sögð af gamalli konu sem sat andspænis mér við borðið og rifjaði upp sína eigin fermingu sem fór fram vestur á fjörðum á þriðja tug síðustu aldar.

Hún var frá barnmörgu heimili - ekki óalgengt að fólk ætti 10 börn plús/mínus eitt eða tvö. Hún var elst og ekkert verið að mylja neitt sérstaklega undir hana.

Veturinn sem hún fermdist sá hún um að þvo og staga í fatnað fyrir nokkra sjómenn sem gerðu út frá heimahöfn hennar. Þetta hefur örugglega eitthvað sérstakt heiti en ég er ekki vel að mér í íðorðum barnaþrælkunar á liðnum öldum - enda sjálfsagt og eðlilegt að krakkar gerðu gagn eins og það hét.

Það skiptir ekki máli í þessu samhengi. Það sem líður mér ekki úr minni er að hún sagði ferminguna hafa kostað 50 aura. Hún hafði haft 2 krónur (og fisk handa fjölskyldunni í soðið) í kaup fyrir þvottana og staglið.

Ég man ekki hvernig þetta skiptist enda lagði ég ekki almennilega við mínar sautján ára hlustir fyrr en þar kom í sögunni að hún var á leið til að kaupa sér kápu fyrir aurana sína en fyrst skyldi hún gera upp við prestinn.

Henni hafði verið uppálagt að greiða skuld sína við prestinn áður en hún ráðstafaði afganginum.
Hún rétti prestinum tveggja krónu peninginn. Hann þakkaði henni fyrir og stakk honum í vasann. Hann greiddi henni aldrei mismuninn. Hún sagði aldrei neitt við hann, því eins og hún sagði sjálf þarna við borðið - meira en hálfri öld síðar: ,,Ég var bara krakki.´´

Þetta var sagan af því.

Eitthvað segir mér...

2009-04-10T09:05:00.000-07:00

...að ,,krossfestingarnar´´ í Háaleitinu risti ekki dýpra en sem nemur frönskum rennilás og þegar sé búið að tryggja viðkomandi góða innivinnu.

Í stuttu máli sagt þá var innihald fréttatilkynningar AO á þá leið að honum hefði ekkert komið þetta við en BB hefði ákveðið að reka hann. Auk þess fylgdu með ástar- og saknaðarkveðjur til allra sem vilja þekkja hann.

Bússur og bjöllusauðir

2009-04-07T00:45:00.000-07:00

Atkvæðisþegarnir eru mér enn efstir í huga.

Þessa dagana leita frambjóðendur og/eða fulltrúar þeirra í framhaldsskólana og gera hosur sínar skærgrænar fyrir ungum og óhörðnuðum kjósendum.

Fyrsti bæklingurinn var frá Samfylkingunni: Yngsti frambjóðandinn í gúmmístígvélum með hauskúpum. Stígur maður ekki baneitruð skref í svoleiðis? Eða er pólitíska forin svona viðsjárverð?

Myndmál Framsóknar orkaði tvímælis:
Sauðfé á afturfótunum með hugsanablöðrur sem eru alls ekki til þess fallnar að vekja tiltrú á flokknum: Sauðina dreymir um að kappkynda híbýli sín í glaðasólskini! Lambhrúturinn virðist auk þess vera að svala fýsnum sínum á trjábolnum.

Inni í bæklingnum var álímdur pakki með gúmmíverju (ofan í málsgrein sem fjallaði um hvernig lækka mætti kostnað heimilanna) og ádráttur um að lækka aldurstakmark til áfengiskaupa niður í 18 ár. Eitthvað var drepið á önnur mál, en ég var ekki lengur móttækileg.

Þar sem ég sat og hristi höfuðið í forundran heyrði ég á tal skólasystur minnar og fulltrúa flokksins:

Hún: ,,Hvers vegna í ósköpunum teljið þið að það þurfi að lækka aldurstakmarkið niður í 18 ár?´´

Smalinn: ,,Eh...það er bara svo mikil eftirspurn eftir því!´´

Ég hef ákveðið að setja mig úr færi við kosningasmala - sama úr hvaða herbúðum þeir koma.

Framboð og eftirspurn

2009-03-04T03:11:00.000-08:00

Á mínum bæ er notuð einföld aðferð við að velja atkvæðisþega:

Við bíðum af okkur hamaganginn og skoðum svo hver hefur logið fæstu og svikið minnst.
Þeir sem aldrei hafa verið í aðstöðu til slíks njóta vafans - enda sanngjarnt að þeir fái sömu tækifæri og hinir.

Þeir frambjóðendur sem halda mennskar haugsugur/áburðardreifara fá ekki að vera með í pottinum.

Ég vil ekki kalla styggð þá er kom að þingheimi atgervisflótta - en framboðsfælni fólks sem hingað til hefur varið stöðu sína með kjafti og klóm, er ekki til þess fallin að auka mér, staki í menginu almúgi, bjartsýni.

Ég óttast að sú staðreynd að fólk gefi frá sér vel borgaða innivinnu á tímum sem þessum,orsakist af því að ástandið sé enn ömurlegra en okkur alþýðunni er gerð grein fyrir.

Kjötið er uppurið úr kötlunum og enginn vill súpa seyðið...

Er Dagur...

2009-03-01T10:49:00.000-08:00

...diet-útgáfa af DO?

Það er ýmist í ökkla eða eyra...

2009-02-28T06:27:00.000-08:00

...harðlínukapitalismi eða ystu mörk félashyggjunnar.

Nú þarf að kjósa á milli ellilífeyrisþega og öryrkja...

Augnabrúnir ...

2009-02-26T06:41:00.000-08:00

...eru greinilega lykilorðið í því sem framkomuþjálfari Framsóknar hefur haldið að þeim SDG og HÞ - nema sá síðarnefndi sé bara að þreifa sig áfram í leit að því sem gerði nýkjörinn formann kjörþokkafyllri en hann sjálfan.

SDG er tiltölulega nýfarinn að sitja örlítið álútur og hnykla brýrnar á meðan hann hlustar á spyrilinn, en HÞ hrekkur milli ,,hama´´ og kreppir og réttir brúnirnar í sífellu þegar hann telur sig vera að koma einhverju merkilegu til skila. Svo leysist andlitið upp í viprur.

Líkt og lítill drengur að leika gamlan karl.

,,Bankinn minn! Skammi-skammi-skamm´´ ...

2009-02-25T01:26:00.000-08:00

...var í stuttu máli það sem DO hafði um málið að segja á RUV í gærkvöld.

Þetta var allt skv. bókinni....hans Davíðs.

Hann mætti - af því að hann var tilbúinn með atriðið sitt og hafði greinilega rifjað upp valda kafla úr Ibsen, Shakespeare og Kamban.

Áhrifin voru þessi venjulegu: Maður sekkur í sófann og hlustar á hvert orð og starir eins og Móglí í augun á slöngunni. Það tekur dágóða stund að hrista af sér áhrifin og þá sýpur maður hveljur.

,,Bankinn hans´´...!!!??? Vorum við ,,þjóðin hans´´ á meðan hann gegndi embætti forsætisráðherra? En nú erum við skynlaus hjörð sem JÁJ fjarstýrir upp að gluggunum hans - nótt sem nýtan dag.

Sigmar Guðmundsson ávann sér virðingu mína með frækilegri frammistöðu sinni í gær.

Það var ofurmannlegt af honum að sitja undir óráðshjalinu án þess að bregða svip,
ef frá er skilið stöku vantrúarbros - og lái honum hver sem vill.

Og það rifjaðist upp fyrir mér gamall húsgangur sem smábörnum er kenndur - sjálfsagt til að styrkja þau í eignarfornöfnunum:

,,...ærnar mínar, kýrnar mínar, byttan mín og myllan mín.
Eldhúsið mitt, búrið mitt, baðstofan mín og loftið mitt,
heyin mín, lömbin mín, Heimaflekkur og Mosa.´´

,,Hann er ekki heimskur....

2009-02-23T08:37:00.000-08:00

....bara óheppinn þegar hann hugsar´´sagði seinheppinn sænskur stjórnmálamaður um annan af sama kaliberi.

Þetta rifjaðist upp fyrir mér í dag, þegar ég heyrði Höskuld heppna segja að stundum yrðu menn að fylgja sannfæringu sinni og standa í lappirnar.

Það er hreint með eindæmum hvað maðurinn er illa máli farinn. Ég er farin að halda niðri í mér andanum þegar hann birtist og anda léttar þá sjaldan honum tekst að komast skammlaust frá því að tjá sig opinberlega.

Sem ég hef reyndar einungis orðið vitni að einu sinni.

Er HÞ Framsókn það sem ÁJ er Sjálfstæðisflokknum?

Hásæti?

2009-02-23T06:40:00.000-08:00

„Ég hef talið brýnt að flýta málinu og talið heppilegast að Davíð Oddsson ætti frumkvæði að því að stíga niður úr stól seðlabankastjóra. Mér finnst þetta vera eins og stormur í vatnsglasi að gera veður út af því þótt beðið sé mikilvægrar skýrslu um málið,“

Hefur dv.is eftir Höskuldi Þórhallssyni í dag.

Minni á klisjuna um myndina og 1000 orðin...

2009-02-23T00:49:00.001-08:00

Gylfi, Gylfi og Gylfi.

2009-02-22T01:49:00.000-08:00

Það vekur athygli hversu margir Gylfar eru í umferð og spila stór hlutverk í Íslensku samfélagi á líðandi stundu.

Það gefur tilefni til þess að hressa uppá kunnáttuna í Snorra heitnum Sturlusyni - þið vitið, þessum sem við vorum vön að hampa áður en við fórum að miða allt við þyrluspaða.

http://www.snerpa.is/net/snorri/gylf.htm

Tengslaleysi slóðarinnar stafar af því að einhver að reyna að eitra fyrir mér og ég hef ekki getað sett inn virkar slóðir í nokkra mánuði.

Ískaldur ónotafiðringur...

2009-02-21T01:13:00.000-08:00

...hríslaðist um mig þegar ég las eftirfarandi fyrirsögn á mbl.is í morgun:

,,Ekki sátt um lánssamning Gylfa´´

Þarna komu fyrir tvö lykilorð sem hafa náð að læsast inn í vitund mína og verða þess valdandi að ég hrekk í ,,kombatmód´´:

Sérnafnið ,,Gylfi´´ og nafnorðið ,,lán´´.

Í fyrra tilfellinu koma til tvær skýringar. Annarsvegar Gylfi Magnússon fjármálaráðherra sem öll þjóðin horfir til í óttablandinni eftirvæntingu og hinsvegar Gylfi Zoëga, sem sagði okkur í vikunni að við gætum rétt eins hoppað í hafið. Að vísu notaði hann önnur orð:
,, ...engin framtíð...´´ en meiningin er sú sama.

Orðið lán í merkingunni lánveiting (lán í merkingunni lukka hefur horfið úr málinu á síðustu mánuðum) er eitt þeirra orða sem duga til að harðlæsa sálinni í mér - og ég er örugglega ekki ein um þetta.

Augnablikið sem tók mig að átta mig, á því að þarna væri átt við einhvern mann sem lifði á því að leigja út á sér fæturna á heimsvísu, dugði til að rífa mig upp úr notalegri frímorgunstemningunni og áður en mig varði var ég búin að skrá mig inn í netbankann og farinn að skoða ógreidda reikninga...

Orð eru dýr!

Öndvegis umskiptingur?

2009-02-18T03:13:00.000-08:00

Eftir að Geir kom heim frá Hollandi,eftir velheppnaða aðgerð að eigin sögn, og var skipað til sætis meðal óbreyttra þingmanna, er eins og skipt hafi um hann.

Þegar hann tekur til máls er oftar en ekki eins og hann sé holdiklæddur hátalari í boði eftirlifandi Seðlabankastjóra.

Það gæti haft áhrif að GH á hægri hönd situr kona í umboði Frjálslynda flokksins, sem komst í fréttir fyrir meinta árulestrarkunnáttu og hætt við að hún trufli útsendinguna.

Eða er Geir bara með slæmt tilfelli af Hallgerðar-heilkenninu?

Geir þó!

2009-02-16T16:10:00.000-08:00

Ambögudagurinn mikli!

2009-02-14T08:02:00.000-08:00

Starfsmenn til langs tíma eru sagðir ,, eldri í hempunni´´ á dv.is í dag.

Menn hafa hingað til verið sagðir ,,gamlir í hettunni´´ en hempan er sjálfsagt ágæt til að halda hita á lærinu áður en það lengist sem lífið...

Engum er treystandi!!!

2009-02-14T05:22:00.000-08:00

,,Innlent | mbl.is | 13.2.2009 | 21:27
Peningaþvætti gæti hafa farið fram hjá lögreglu!´´

Þessi fyrirsögn fer í safnið með:

,,Læknar fullyrða að Wallace geti ekki gengið aftur´´ og ,,Skreið til Nígeríu´´

Haarde-Talk!

2009-02-12T10:15:00.000-08:00

Dramatískar breytingar á GH eftir að hann hvarf úr skotlínunni hafa vakið athygli og umhugsun.

Mánuðum saman var reynt að fá GH til að segja hug sinn um ástandið - með litlum árangri.

Stjórnarandstöðuforkólfurinn er aftur á móti kokhraustur svo eftir er tekið.

Þetta er greinilega verra ...

2009-02-10T09:01:00.000-08:00

... en okkur er talin trú um ef bankaráðsformenn eru farnir að segja af sér í hópum.

Blankt blávatn...

2009-02-10T08:36:00.000-08:00

...dregur síður dilk á eftir sér.

Á mínum bæ höfum við bara vatn með soðningunni í hádeginu.
Sennilega hjálpar það til við að halda heimilisfriðinn.

Athugið!

2009-02-07T02:25:00.000-08:00

Hefur trúnaðarlæknir starfsmanna Seðlabanka Íslands ekki skyldum að gegna?

Og úr því að ég er byrjuð:

Hvar liggja mörkin á milli hunsaðrar uppsagnar og bankaráns?

Er ástandið svona?

2009-02-06T09:35:00.001-08:00

Hárafar og heilsa.

2009-02-06T09:03:00.000-08:00

Líkamlegt ástand dýra má lesa úr hárafari þeirra og bágt andlegt ástand kemur einnig fram í pelsinum. Skepnan ýfir sig og reisir burst, sem er meðfætt varnarbragð úr dýraríkinu og ætlað til þess að vekja ranghugmyndir um veraldlegt umfang og þ.a.l. vigt og mótstöðuafl.

Þess eru dæmi um að útsjónarsamir geltir, sem jafnvel eru orðnir farlama og með tannlos geti með þessu móti vakið ótta og stökkt mun sterkari óvini á flótta - bara með greiðslunni.

Af merkjasölu Siðblindravinafélagsins.

2009-02-05T01:43:00.000-08:00

Sá sem í ársbyrjun 2009 lítur svo á að upptaka eigna hans verði ,,...brunaútsala aldarinnar!´´ verður um leið ber að því að hafa ekki hæfileika til að hugsa fram í tímann. Það eru jú ríflega níu áratugir eftir og óskrifuð saga í hlutfalli við það.

Sennilega liggur rót vandans einmitt í þessari sértæku fötlun: að bera ekki kennsl á skuldadægur og leita sífellt til nýrra ,,blindravina´´ eftir eldsneyti.

Nú hefur merkjasölu Siðblindravinafélagsins verið hætt og því neyðast fyrrum skjólstæðingar þess til að glenna upp skjáinn og horfast í augu við skuldadagsljósið!

Endalaus uppgerð!

2009-02-04T05:45:00.000-08:00

Áskrifin er útrunnin og verður ekki endurnýjuð, skv. fréttum af viðskiptavild Baugs í Landsbankanum.

Þar sem JÁJ er orðinn ærulaus á Íslandi, sér hann þann kost vænstan að hamra á því að 50.000 Bretar missi vinnuna ef Baugi verður gert að horfast í augu við raunveruleikann. Íslendingar mega súpa hel fyrir honum.

Svo bregður hann fyrir sig neðanmittislíkingu - sem hingað til hefur ekki tíðkast í hérlendum fréttaflutningi - enda JÁJ frumkvöðull í eðli sínu.

Og svo...og svo...kemur ekki útvatnaða tuggan um DO!

Það væri fróðlegt, í ljósi sögunnar, að sjá fréttina sem birtist í fréttatíma Stöðvar 2 um árið og sýndi JÁJ ganga á fund DO þar sem hann hugðist bjóða honum vináttu sína. Sú ferð fékk snautlegan endi.

En eitthvað segir mér að þessi frétt sé ekki aðgengileg í ,,arkívum´´ Stöðvar 2 - en ég lýsi hér með eftir henni.

Málþróun...

2009-02-03T02:40:00.001-08:00

a) Að kunna að fara með fé.

b) Að kunna að FARA með fé!

Var DO ekki hættur að halda hunda?

2009-02-03T02:15:00.000-08:00

Fésbókarþáttur.

2009-02-02T01:01:00.000-08:00

Kviknakta spunakonan var rétt í þessu að skoða fjölskyldumyndir sem henni koma ekki baun við og alls ekki víst að eigendurnir kæri sig nokkuð um að hún sé að skoða viðkvæm fjölskylduandartök.

Þegar Fésbókarvinur gerir athugasemd við ljósmynd vinar síns, opnast öllum hans vinum leið inn í albúmið - og þá er hægt að afrita að vild.
Vonandi átta allir sig á þessu.

Já, vináttan á Fésbók getur knúið endalausar vangaveltur. Sumum virðist hlaupa eitthvað fjárbændakapp í kinn og merking orðsins vinur er orðið býsna útþynnt.

Eflaust hefur Fésbók skarað að gömlum glæðum einhvers staðar og ábyggilega eigum við eftir að lesa lærða tölfræði um þátt þessa tvíbenta afþreyingartækis á stöðugleika innan fjölskyldunnar eða hvað það heitir á fagmáli.

Lítil saga af Fésbók:

Ég var að forvitnast um einhvern og fékk þá upp lista með alnöfnum viðkomandi, þar á meðal manns sem ég umgekkst tímabundið þegar við vorum unglingar.

Ó, hvað var að sjá! Hann átti bara einn vin!
Þjóðþekktan sálfræðing sem sérhæfir sig í að greina veruleg afbrigðilegheit innan fjölskyldna og uppræta þau í framhaldinu. Og engin mynd!

Og þegar í stað var ég búin að spinna upp ,,sínerí´´ þar sem sálfræðingurinn var að telja hann á að blanda geði við fólk.

Og ég fylltist sammannlegum kærleik og bauð honum Fésbókarvináttu mína án frekari umhugsunar.

Ég hef ekki fengið nein viðbrögð - en það rifjaðist upp fyrir mér að hann og þessi sálfræðingur tilheyrðu sama kreðsinu á menntaskólaárunum...

Flight Bag ...

2009-01-31T09:24:00.001-08:00

... öðlaðist nýja merkingu í byrjun október þegar íslenskir auðmenn streymdu úr landi með 14 (sumir segja 18) ferðatöskur...

Með hliðsjón af því...

2009-01-31T03:36:00.000-08:00

...að heilum fjórðungi bregður til fósturs er líklegt að þeir sem hafa alist upp innfæddir á Framsóknarheimilum hljóta að hafa orðið fyrir mótunar-/eitrunaráhrifum í uppvextinum.

Eldfælni þjóðarinnar byggist á sögunni en ekki óljósum fregnum af einu brenndu barni...

Smalar?

2009-01-31T01:49:00.000-08:00

Er það ekki samheiti yfir þá sem taka að sér flytja fé og gæta þess?

Eitthvað hefur starfslýsingin skolast til því nú er ekki gert ráð fyrir að smalinn skili af sér í upprunakvíum.

Sauðaþjófnaður er sauðaþjófnaður er sauðaþjófnaður...

Úr ökkla í eyra.

2009-01-31T01:38:00.000-08:00

Krafan um ógifta munaðarleysingja við fagmönnun embætta til 3.mánaða er óframkvæmanlegur barnaskapur!

Hjálparhendur vs. eyðsluklær.

2009-01-29T21:57:00.000-08:00

Þegar menn tala um solli sem mannvænleg ungmenni geta lent í þá gleymist oft að það eru líka ill örlög að lenda óharðnaður í samkrulli við unglinga frá forhertum frjálshyggjufjölskyldum.

Það er ömurlegt að horfa uppá áður kærleiksríka unglinga breytast í kalda og ómanneskjulega frjálshyggjumenn sem sjá engin verðmæti önnur en þau sem hægt er að flytja rafrænt á milli landa - og þá helst suður á bóginn.

Það er sorgleg firring að þekkja ekki í sundur hjálparhendur og eyðsluklær.

Ég fagna tilurð ríkisstjórnar Jóhönnu Sigurðardóttur og óska henni allra heilla.

Botninn?

2009-01-28T23:31:00.000-08:00

Það er vandséð hvernig komist verður lengra frá ábyrgð sem menn bera á einhverju á Íslandi en á 4000 m tind á Suðurskautinu.

Konungur leppalúðanna?

2009-01-28T09:21:00.000-08:00

Leppalúði er skv. nútíma málskilningi maður sem ljær auðmanni nafn sitt gegn greiðslu.

Skv. því hlýtur sá er flesta leppi hefur á sínum snærum að vera konungur leppalúðanna.

LANDSSÖFNUN !

2009-01-28T00:55:00.000-08:00

Skv. fréttum kostar 78.4 milljónir að losan við Davíð úr Seðlabankanum!

Eru ,,ökónómípakkningar ´´ ódýrari?

2009-01-27T00:33:00.000-08:00

Dagleg framför í kristilegu hugarfari er auðvitað ,,ideal´´skv. boðskap æðsta yfirmanns kirkjumálaráðherra.

En dómsmálaráðherra uppáleggur óeirðalögreglunni að bjóða mönnum í hitt augað.

En þessi stjórnlausa gleði yfir einum villuráfandi sauði sem bætti ráð sitt hefur hrokkið á milli embætta í BB og þjóðin situr uppi með enn eina embættisveitingu sem gefur tilefni til vangaveltna.

En vissulega má líta svo á að í þessu felist ákveðin hvatning til afbrotamanna um að bæti þeir ráð sitt séu þeim allir vegir færir...

Framsóknarmaddaman fitjar uppá ...

2009-01-26T08:53:00.000-08:00

...almennilegum vettlingum á ríkisstjórnina!

Höskuldur heppni...

Myndin af Dorian Gray?

2009-01-26T04:52:00.000-08:00

Hvaða málverk ætli Bjarni Ármanns hafi þurft að losa sig við?

VARÚÐ!

2009-01-26T01:49:00.000-08:00

Íbúar Skerjafjarðar og nágrennis eru varaðir við því að brennisteinsmagn andrúmslofts mælist langt yfir hollustumörkum.

Íbúar í hverfinu hafa veitt því athygli undanfarið að það stórsér á ljósu líni sem hengt er út til þerris.

Eins er varasamt að leggja ungviði út til svefns í vögnum - þar til pólitísk vindátt breytist.

Jónas þarf vammlausan fylgdarmann ...

2009-01-25T09:55:00.000-08:00

...allan sólarhringinn fram að starfslokum!

Sá mundi t.d. hafa það á sinni könnu að yfirfara allt sem Jónas fleygir í ruslið, setur í tætarann og síðast en ekki síst: hreinsa undan stólunum.

Úr skálum reiðinnar.

2009-01-25T07:46:00.000-08:00

Búfjárhagsleg heilsa ÁM fer sífellt versnandi og líklegra en ekki að hann verði sleginn af fyrir mjaltir - ásamt öðrum búpeningi Sjálfstæðisflokksins.

Ég lít á afþökkun Björgvins á biðlaunum sem fyrirfram greidd krosseignatengsl við eigin kosningasjóð.

Og úr því að ég er byrjuð:

Það er brýnt að þeir sem nú eru að öðlast kosningarétt átti sig á því að ókeypis pizza og bjór í kringum kosningar draga 48 mánaða ófyrirsjáanlegan raðgreiðsludilk á eftir sér og geta t.d sent ömmu beinustu leið á tvíbýli í öðrum fjórðungi!

Finndu frumkraftinn!

2009-01-25T01:37:00.000-08:00

Ég lét verða af því í gær.

Unglingurinn minn lét í veðri vaka, þegar ég var að búa mig, að ég væri í þann mund að fremja félagslegt morð á honum.

Ég daufheyrðist, fór í ullarleista,gúmmískó og ,,sándtékkaði´´ stálskálarnar mínar - sem fyrir skáldlegt réttlæti voru keyptar í Bónus í byrjun góðærisins.

Hingað til hef ég látið duga að klappa og úa eftir efninu.

Og ég get staðfest að ,,træbal rílís´´ rífur mann uppúr doðanum.

Þegar ég kom heim aftur dreif ég í óyfirstíganlegum verkum sem hafa setið á hakanum - án þess að taka eftir því að ég væri að vinna þau.

Skoðaði heimaverkefnið sem ég átti að vera búin að skila og áttaði mig á því að það var bara smámunir.

Í morgun leit ég glaðan dag - í fyrsta sinn í langan tíma.

Og allt af því að ég tók virkan þátt og losaði um gremjuna.

Undanfarið ...

2009-01-24T17:32:00.000-08:00

...hafa hræfuglarnir í "Jungle Book" sótt á huga minn aftur og aftur.
Svo rann það upp fyrir mér!

Þessi smjörklípa...

2009-01-24T00:21:00.000-08:00

...var svo vel útilátin að stór hluti þjóðarinnar rann á rassinn!

Og svo hrökk maskínan í gang!
Fólk sem ekki var tilbúið að gleyma raunveruleikanum sem blasti við - jafnt fyrir og eftir afar vel útfærðan blaðamannafund, var samstundis úthrópað samviskulausir þorparar.

Maðurinn Geir H. Haarde á alla samúð fólks - en forsætisráðherrann Geir á ekkert inni hjá þjóðinni. Þar verður fólki að lærast að greina á milli!

Annars blasir við okkur ömurleg framtíð einhverskonar ,,vanheilsustjórnmála´´.

Þjóðin þarf ríkisstjórn ...

2009-01-23T09:50:00.000-08:00

...ekki SJÚKRASAMLAG!

Hvernig æxlast þetta?

2009-01-23T04:39:00.000-08:00

Maður fer að hallast undir karmalögmálið!

Að taka örlögum sínum - á eigin kostnað!

2009-01-23T02:17:00.000-08:00

Það er sorglegt að þurfa að hverfa frá störfum vegna heilsubrests, en ISG er ekki vandara en hinum - og mun meira í húfi en bara perónuleg heill og hamingja hennar.

Það að IHS skuli ekki víkja af sjálfsdáðum vekur upp spurningar um dómgreindarbrest - sem skrifast á eðli veikinda hennar.

Það er óþægileg tilhugsun að þeir sem hópast næst stokknum hafi hvorki hagsmuni ISG né þjóðarinnar að skærasta leiðarljósi.

P.S. Tíðindi dagsins gefa ekki tilefni til annars en hnykkja á því að þetta gildir um alla - hvar í flokki sem þeir standa!

Hlutfall ofbeldisseggja...

2009-01-22T00:00:00.000-08:00

...er trúlega svipað í röðum lögreglu og mótmælenda.

Og báðir hópar tíunda gjörðir hins.

Það væri fróðlegt að sjá lærða útreikninga á þessu miðað við höfðatölu.

Nýlitaður hvirfill forsætisráðherra...

2009-01-21T13:25:00.000-08:00

...dugði ekki til að sannfæra mig um að þar færi maður fyrir sínum dyrum.

Um miðbik Kastljóss í kvöld átti ég rétt eins von á því að G.H.H. stykki á fætur, ryddi stólnum aftur fyrir sig og syngi:
"Regrets, I´ve had a few;
But then again, too few to mention..."

En sem betur fór tókst Sigmari að hafa hemil á honum. Ekki þar fyrir að Steingrímur næði að vinna hylli mína - þó svo að ég sé viss um að vænn hluti fylgis hans samanstandi af fólki sem átt hefur í litlum sem engum samskiptum við feður sína eins og ég.

Öðru megin við borðið sá ég glitta í eitthvað grátt undir gærunni og hinum megin sat bugaður maður með spánýjan háralit sem gerði ekki annað en að undirstrika náfölvan og ráðleysið.

Meira stuð!

2009-01-21T01:27:00.000-08:00

Þar sem lögreglunni er orðið tamt að brúka úðabrúsa á mannamótum, án þess að þjóðin hundskist til síns heima, þykir sýnt að ekki má dragast að lögverðir fái til afnota búnað með meiri sannfæringarkraft.
Fólk sem er svo forhert að það stendur nánast kyrrt í sömu sporum, hellir niðurgreiddri landbúnaðarvöru í augun hvers annars og heldur áfram að heimta lýðræði þarf öflugri hirtingu.

Nú þarf svolítið stuð á mannskapinn!

Í fyrravor var í fyrsta sinn brúkaður piparúði á islenska mótmælendur.
Miðað við hversu hröð aukning hefur orðið í notkun úðans og lækkun þröskuldarins sem réttlætir notkun hans í augum(án gríns)stjórnvalda, má búast við að góan verði ekki öll þegar stuðun kvenna á breytingarskeiði og stálpaðra unglinga verður orðin hefð við löggæslu á Íslandi.

Að lokum vil ég benda fólki á að skoða síðuna taser.is

Þar er sýnt fram á með tölum hversu bráðhollt það er að verða fyrir raflosti.
Mér sýnist að þetta sé eitt skjótvirkasta meðal við hægðatregðu sem völ er á.

Eyðsluklóin ég ...

2009-01-20T12:40:00.000-08:00

...fór til tannlæknis í morgun. Að vísu hef ég getað haldið tannlækniskostnaði í lágmarki með hysterískri tannburstun frá því mamma treysti mér fyrir burstanum fyrir röskum fjórum áratugum.

Bað svo tannlækninn um að pensla smávægilegt munnangur sem ekki hefur látið undan fjólubláa ófögnuðinum sem seldur er lyfseðilslaust í lyfjabúðum og er líklegri til að eyðileggja fatnað en að lækna sár.

Þá kom upp úr kafinu að eftir að Bretar vinir okkar settu á okkur hryðjuverkalögin margumræddu, þá hafa þeir ekki selt okkur lyf af neinu tagi. Enda ástæðulaust að púkka uppá stórhættulegt pakk eins og Íslendinga.
Í því felst t.d. að selja tannlæknum ýmsar nauðsynlegar rekstrarvörur!

En eins og við vitum þá er allt með allra besta mögulega móti á Íslandi.

Ég er með ónotafiðring...

2009-01-18T03:09:00.000-08:00

...vegna þess að ég las forsíðufrétt á mbl.is sem sagði frá því að aðstoðarfólk Anders Fogh Rasmussen réru að því öllum árum að koma á fundi með Obama og AFR.
Það var þá sem ég fann fyrst fyrir þessu.

Íslenskir ráðamenn eru svo sviðsljóssæknir að full ástæða er að óttast að þeir setji sig ekki úr færi við að segja Obama til - nýgræðingnum.

Hakuna Matata!

2009-01-17T02:50:00.000-08:00

Scar, Simba, Rafiki og Zazu eru mér hugleiknir í dag.

Það ber að hafa í huga að konungur ljónanna var í raun ekki konungur ljónanna - heldur allra kvikindanna á svæðinu.

Einhverra hluta vegna hefur heimaverkefni helgarinnar, sem er að fjalla í stuttu máli um valdabaráttu í "The Lion King" lostið saman við fréttir af Framsóknarflokknum í kollinum á mér.

Dropinn...

2009-01-14T23:30:00.000-08:00

... sem fyllti tankbílinn!

Ef núverandi fjármálaráðherra verður ekki vísað úr því auma kreðsi sem gengur undir nafninu ríkisstjórn, er sýnt að ráðherrar halda hverjir öðrum í gíslingu með einhverju afglaparegistri sem er þessu fólki meira virði að fela en að standa frammi fyrir þjóðinni(og þeim hluta heimsbyggðarinnar sem hefur áhuga á málinu)rúið trausti og margbert að lygum af öllum stærðargráðum.

Ég skammast mín fyrir ríkisstjórnina!

Hvað næst?

2009-01-14T07:18:00.000-08:00

Nálgunarbann á raunveruleikann?

...og úr því að ég er byrjuð:

Svo er að sjá sem borgarfulltrúi Samfó meti stöðuna svo vonlausa að óhætt sé að segjast vera á móti ríkisstjórnarsamstarfinu.

,,Ef væri ekki líf að loknu þessu, þá labbaði ég í sjóinn strax í dag!´´
kvað Steinunn Sigurðardóttir seint á áttunda áratugnum.

Geir hefur áhyggjur ...

2009-01-13T02:40:00.000-08:00

... af ungum Íslendingum skv.tímaritinu "Monocle".

Þar er ég sammála honum en ég er óviss um að áhyggjur okkar séu á sömu rökum reistar.

Verst þykir mér að Geir áttar sig ekki á því að það er á hans valdi að draga úr fjöldalandflótta ungs fólks. Ég nenni ekki einu sinni að slá inn alla möguleikana sem Geir Haarde hefur til að leysa þetta áhyggjuefni sitt.

Það liggur beinast við að hann leggi lóð sitt á vogarskálarnar með því að fá sér aðra vinnu.

Mannlegt samfélag...

2009-01-11T10:13:00.000-08:00

...lýtur ekki lögmálum Tetris, þar sem allt er klippt og skorið í rétthyrninga - sigurverarinn sá sem nær að gera leikvöllinn að engu.

Sjúkrahús snúast um sjúkt fólk og slasað - ekki köku-, súlu- og línurit.

Sá er eldurinn heitastur er á sjálfum brennur - það ætti Guðlaugur Þór að vita!

Í boði Endurvinnslunnar?

2009-01-10T12:59:00.000-08:00

Af óviðráðanlegu orsökum varð ég áhorfandi að 1.lotu Evróvisjón.

Það var skáldlegt réttlæti að strax á eftir að valdir kaflar úr þemalagi Fríðu og Dýrsins hljómuðu, var rifjað upp lagið sem aldrei var leikið eftir að það vann Eurovision - vegna þess að uppruni þess þótti í meira lagi vafasamur.

Mér þóttu feðginin Skagfjörð ferskust.

Allar ferðir hefjast á einu skrefi...

2009-01-04T05:11:00.000-08:00

... og því má renna stoðum undir að allar hefðir eigi rætur að rekja í eina gjörð*

Ég hreifst ekki af ræðumanninum unga á Austurvelli í gær og vona að ákvörðun um að setja barn á mælendaskrá verði einsdæmi.

Því það er ekki endilega samasemmerki á milli þess að vera klár og kotroskinn - að umræddri stúlku ólastaðri.

Þeir sem hafa haft sig í frammi og verið fylgjandi ,,málfrelsi barna´´ o.s.frv. benda gjarnarn á að börn séu á Austurvelli í fylgd foreldra sinna og þau hafi bara gott af því.

Má ég þá benda á þá staðreynd að það er börnum hollt að sækja leikhús, en fæst eiga þau erindi uppá svið.

*dregið af sögninni að gera.

Er offramboð bóluefni?

2009-01-03T04:50:00.000-08:00

Hvað ætli meðal- miðaldra vesturlandbúi hafi horft á marga sólarhringa af myndefni um helförina? Allir settir fram undir þeim formerkjum að þetta væru atburðir sem ekki mættu gleymast - svo að þeir endurtækju sig ekki.

Á hverju ári horfum við á mismunandi þjóðarmorð í sjónvarpsfréttum og dáumst að flinkum fréttaljósmyndurum fyrir að færa okkur atburðina inná gafl.

Svo ropum við og segjum: ,,Aumingja, blessað fólkið´´, ef úttroðinn gúllinn varnar okkur ekki máls.

Taglhnýtingar...

2008-12-31T23:20:00.000-08:00

...bjóða uppá hártoganir.

Bláu borgarfulltrúabloggin...

2008-12-31T05:02:00.000-08:00

...eru ekki bara frá útlöndum - sum virðast hreinlega vera frá öðrum hnöttum!

Það er ekki sama borgari og borgari!

2008-12-30T06:28:00.000-08:00

Þetta er síðasti dagurinn sem hægt er að rukka mig. Heimilisreksturinn hefur verið svo erfiður að ég varð að segja upp heimilisfólkinu um áramótin. En í janúar stofna ég nýtt heimili með breyttum matseðli þar sem allir fjölskyldumeðlimir fá inni.

Ég er að vísu ekki búin að leysa þetta með kennitöluna...

JÁJ vill ekki ...

2008-12-30T03:51:00.000-08:00

...láta kalla sig óreiðumann.

Það er skiljanlegt - mér finnst óþægilegt þegar fólk segir að ég sé of feit...

Svart/hvítur draumur?

2008-12-29T07:35:00.001-08:00

Nú er að bíða og sjá fyrir hverju það er að dreyma Obama og Margeir Pétursson.

Eg sé ekki annan snertiflöt en svart og hvítt...

Ég játa fúslega...

2008-12-28T03:34:00.000-08:00

...að ég skil ekki röksemdafærslur um nauðsyn samkeppni meðal innheimtufyrirtækja.

Það hlýtur að vera í þökk lánardrottna að fá sem mest fyrir kröfuna - sem hlýtur eðli málsins samkvæmt að bitna á skuldurum. Aðlögunartími fyrir innheimtuaðila???

Svipað og að krefjast aðlögunartíma fyrir böðla við afnám dauðarefsinga.

Ávallt viðbúinn!

2008-12-28T01:24:00.000-08:00

Þegar það þótti sýnt að sala áfengs öls yrði leyfð á Íslandi gerðu forsjálir menn klárt með fyrirvara og opnuðu svo daginn sem lögin gengu í gildi - því framundan var gósentíð í bransanum.

Það er gert ráð fyrir að það kreppi fyrst almennilega að þjóðinni á þorranum og þá lifnar yfir líkhúsunum...

Hvað er svona merkilegt við það...

2008-12-27T18:30:00.000-08:00

...að vera andsetinn?

Viðmælandi DV segir frá þessu eins og brjósklosi eða æðahnútum. Ég játa að vísu að mér þóttu alveg nógu mörg brjál í úrdrættinum og lagði ekki á mig að lesa hvernig konan losnaði undan þessari áþján - svo veit maður ekkert hvernig þetta smitast.

Spyrillinn hlýtur að hafa átt massíft ,,ég-er-normal-móment´´ að loknum þessum greinarskrifum!

Gleðileg jól...

2008-12-24T06:07:00.000-08:00

... og njótið líðandi stundar!

2008-12-20T03:43:00.000-08:00

Ég lenti í orðaskaki við aldraða móður mína í morgun þegar hún hóf máls á að nú væri verið að ofsækja hann Jóhannes, eina ferðina enn.

Eg hef komið henni í skilning um að það hefði verið hagstæðara, þegar upp er staðið, að borga heldur meira fyrir daglega brauðið og halda innviðum þjóðfélagsins á réttum kili.

Ég sárskammast mín fyrir að missa stjórn á mér , en ég er hrædd um að fleiri fjölskyldum sinnist vegna ástandsins. Og að Jóhannes og fjölskylda eigi sér enn stuðningsmenn í röðum aldraðra fátæklinga sem lesa bara fríblöð í þeirra eigu.

Ég fer með mömmu í Nettó í dag!